Excellentissime, ac per quam gratiose Domine Domine!

Iam dudum in me est ingens desiderium, ad felicissime unitas Provincias suas proficiendi, catholicis ibi degentibus ecclesiastica, atque aliis omnibus quaecunque mihi possibilia obsequia ad communem utilitatem, ac firmamentum praestiturus, sed nunquam sese offerebat occasio illuc veniendi.

Nuper cuidam mentem meam desuper aperui, consilii capessendi gratia. Fuit saluberrime suasum mihi, ut Excellentissime Dominationi vestra ingens hoc cordis mei desiderium litteris manifestarem, praepotensque Excellentissimae Dominationis vestrae auxilium imediate ac humillime implorarem.

Vi hujus consilii hisce Excellentissimam Dominationem vestram flagito quam humillime, ut mihi securam facere dignetur viam ad suas felicissime unitas Provincias. Pro qua immortali gratia me sibi semper habebit obstrictissimum.

Quidquid virium in me est, impendam promtissime pro augmentando flore inclitarum Provinciarum ubique locorum sive nunc in campo martio, sive reportata pace suavissima alibi ad nutum gratiosissimi sic Dicti Congressûs. Pro queiscunque servitiis mihi est sanitas necessaria, aetas triginta annorum adhuc robusta satis, ac scientia debita, quod colligere licet ex officio concionatoris, quo fungebar Zaunis Herbipoli in franconia, unde originem traho, 3 annis Mannhemii in Palatinatu Rheni, et nunc Marsilia, ubi commoror in ecclesiasticis servitiis Nationis Germanicae, et pro addiscenda lingua gallica. Mores, queis Ecclesiastici aliis praelucere debent, semper exhibebo integros auxiliante Dei gratia.

Si igitur Excellentissima Dominatio vestra me hocce modo in America proficuum credat, dignetur gratissime remittere mihi responsorias favorabiles, queis intimatur mihi grata facultas, ac via secura in Americam pergendi. Iis receptis necessariam meorum Superiorum in Germania commorantium licentiam procurabo, qui hisce ad cineres persisto cum debita veneratione, et submissione Excellentissimae Dominationi vestrae servus obsequiosissimus