Termo Paschatis 1762 Convoc[atione]

Die Ven[eris] Viz Tricesimo Die Mensis Aprilis Anno Dom. 1762 Causa Convocationis erat ut Ornatissimus Vir Benjaminus Franklin Armiger Provinciae Pensylvaniae Deputatus, ad Curiam Serenissimi Regis Legatus, Tabellariorum per Americam Septentrionalem Praefectus Generalis, et Veredariorum totius Novae Angliae Praefectus Generalis, necnon Regiae Societatis Socius (si ita Venerabili Coetui placeret) ad Gradum Doctoris in Jure Civili, et Gulielmus Franklin Armiger Juris Municipalis Consultus ad Gradum Magistri in Artibus admitterentur, necnon ut Literae ab Hon-oratissimo Cancellario ad Senatum datae legerentur et ut alia Negotia Academica peragerentur.

Causâ Convocationis sic indictâ proponente sigillatim Domino Vice-Cancellario placuit Venerabili Coetui ut praedictus Ornatissimus Vir Benjaminus Franklin Armiger ad Gradum Doctoris in Jure Civili, et Gulielmus Franklin Armiger ad Gradum Magistri in Artibus Honoris Causa Admitterentur.

Spectatissimum Virum Benjaminum Franklin Armigerum praeeuntibus Bedellis in Domum Convocationis ingressum Dextrâque prehensum Dominus Doctor Seward Collegii Divi Joannis Baptistae Socius sub eleganti Orationis Formulâ Domino Vice-Cancellario et Procurantibus praesentabat ut ad Gradum Doctoris in Jure Civili Honoris Causa admitterentur: Quemque hoc modo praesentatum Dominus Vice-Cancellarius suâ et totius Universitatis Authoritate ad dictum Gradum Honoris Causâ solenniter admisit.

Ornatissimum Iuvenem Gulielmum Franklin Armigerum a Thoma Nowell A. M. Collegii Orielensis Socio et Publico Oratore similiter praesentatum Dominus Vice-Cancellarius ad Gradum Magistri in Artibus similiter admisit.